Header image

Historia

Colegio San Antonio

Riba un dia na aña 1959 Zuster Cecilia a acerca “Moeder-overste”, e tempo ey Moeder Mechtilda di convento di “Zusternan Franciscanessen van de Heilige Antonius” di Sta. Cruz, pa pidi’e permiso pa habri un “MULO-school” na Sta. Cruz. E permiso aki a keda otorga mesora.

E tempo ey a cuminsa cu dos 7de klas MULO den edificio di Maria School. E problema di mas grandi tabata cu St. Jozef School, awe Colegio San Hose, tabata pa mucha homber y Maria School tabata pa mucha muhe so. Esaki a pone cu Zr. Cecilia mester a haci tur su esfuerso pa haya e autorisacion di Monseigneur na Willemstad pa ubica e klasnan, como cu nos ta forma parti di bisdom.

Mientras cu a cuminsa cu e prome klasnan di MULO, a cuminsa cu construccion di e prome “hala” di St. Antonius College den cunucu di cocolishi poco mas pabou y pasuit di St. Jozef School.

Na september 1960 St. Antonius College ta habri na Sta. Cruz y 1ste y 2de klas di MULO a continua pero cu mucha muhe den un lokaal y mucha homber den otro lokaal.

Den transcurso di aña 1961 nos por a papia di “gemengde groepen”, esta mucha homber y mucha muhe hunto. Dia 19 di januari 1962, Monseigneur Holterman a bendiciona e scol nobo.

Zr. Cecilia mes a yega Aruba na aña 1957 y a traha na Hospital y despues a bay traha como maestra di scol. Zr. Cecilia a bira asina e prome cabesante di St. Antonius College y a keda cabesante te na juli 1976. Lamentablemente dia 15 di oktober 2003, Zr. Cecilia a bay laga nos. Su balentia y perseverancia semper a keda como ehempel pa docente y alumno.

Na 1976, Sr. Esteban Solagnier (Chebito) a tuma over y a maneha e barco te na 1992. Durante e periodo aki St. Antonius College a cambia su nomber pa Papiamento y a bira Colegio San Antonio. Despues cu Sr. Solagnier a bay cu un penshun bon mereci, Juffrouw Ria Mossel a dirigi e scol y a keda den e funcion aki te na aña 2001. Di 2001 te cu 2016 Colegio San Antonio Tabata bou direccion di Sr. Mario Tromp. Actualmente Sr. Gershwin Lee ta director di scol.

Nos mester agrega tambe cu na e scol aki a cuminsa cu e prome “avond onderwijs” (HBS) na Aruba. Algun ex-alumno di MULO a cuminsa cu e iniciativa pa laga “lesmateriaal” bin for di Hulanda (L.O.I.) pa por a sigui cu e tipo di enseñansa aki na Aruba. Zr. Cecilia a pone local disponibel pa e lesnan di anochi. E prome maestronan a duna e lesnan “pro deo”. Mas despues e bunita iniciativa aki a bira un fundacion y un di e motornan grandi tras di esaki tabata Zr. Antonia.

Un nota historico ta e echo cu Sr. G.F.(Betico) Croes, considera como Libertador di Aruba, tambe a traha como maestro na Colegio San Antonio. E tawata duna les den lokaal 11.

Crecemento y expansion

Den transcurso di e añanan cu a pasa e scol a crece enormemente. Tempo cu a expande e scol pa ubica e departamento de ETAO, nan a construi 7 “noodlokalen” cu mester a keda pa 1 aña pa asina duna chens pa traha un “hala” nobo parti pasuit di e edificio actual unda lo a ubica e departamento nobo. Lamentablemente e edificio nobo nunca a bin y e “Noodlokalen” ta para eynan pa mas di 40 aña. No obstante hopi peticion, ainda nos no a haya ni edificio nobo, ni renobacion di esun existente.

Di e 7 “noodlokalen”, 5 a keda den uzo y a haya 5 trailer acerca for di 3 diferente compania. Mientrastanto e scol tawatin mas cu 400 alumno y mester bisa si cu apesar di e infrastructura pober aki e alumnonan a produci satisfactoriamente.

Durante e vakantie di oktober di 2012 parti di e dak di e prome hala di scol a bin abou debi na mal tempo cu yobida fuerte. Na aña 2013 a dicidi di renoba y amplia e scol y consecuentemente mester a muda pa Centro di Bario Dakota. Aki a imparti enseñansa pa un period di 3 aña. Dia 8 di April 2016 a inaugural e edificio renoba cu su hala nobo y e dia 11 despues, alumnonan a cuminsa haci uzo di nan scol nobo.

Como scol nos ta trata na duna e miho enseñansa posibel pa asina e alumno produci riba e nivel cu ta wordo exigi di dje. Colegio San Antonio ta conoci pa ta un scol cu hopi disciplina y nos kier mantene esaki asina tambe.

Nos scol na e momento aki ta den pleno desaroyo pa loke ta trata digitalizacion. E scol tin dos canal di Wifi, uno pa alumno y otro pa docente. Alumnonan ta wordo encurasha pa haci uzo di laptop of tablet na scol. Docentenan ta haci uzo di diferente aplicacion manera Edmodo, Kahoot y Nieuwsbericht na momento di duna les. Aunke cu e desaroyonan nobo ta trece diferente reto cu nan, Colegio San Antonio ta busca semper pa saca e mihor probecho na bienester di e alumnonan. Tambe ta keda busca e mihor forma pa adapta nos enseñansa na e exigencianan nobo di nos sociedad y e Mercado laboral.

Colegio San Antonio, consistiendo di un team dinamico y profesional ta y lo keda traha na bienestar di nos enseñansa pa asina yuda nos hobennan haya e lugar cu nan merece den nos comunidad.

Aña pasa e graduadonan di Colegio San Antonio tabatin un resultado exitoso atrobe. Nos ta orguyoso cu 80% di e hobennan a pasa nan examen cu exito. Nos lo sigui traha cu hopi entusiasmo pa sigui guia e hobennan den un enseñansa profesional manera nos pais ta exigi di nos.