Historia

Colegio San Antonio

(MAVO - Sta.Cruz) despues di 50 aña

Riba un dia na aña 1959 Zuster Cecilia a acerca "Moeder-overste", e tempo ey Moeder Mechtilda di convento di Zusternan Franciscanessen van de Heilige Antonius di Sta. Cruz, pa pidi'e permiso pa habri un "MULO-school" na Sta. Cruz. E permiso aki a keda otorga mesora.

E tempo ey a cuminsa cu dos 7de klas MULO den edificio di Maria School. E problema di mas grandi tabata cu St. Jozef School, awe Colegio San Hosé, tabata pa mucha homber y Maria School tabata pa mucha muhe so. Esaki a pone cu Zr. Cecilia mester a haci tur su esfuerso pa haya e autorisacion di Monseigneur na Willemstad pa ubica e klasnan, como cu nos ta forma parti di bisdom.

Mientras cu a cuminsa cu e prome klasnan di MULO, a cuminsa cu construccion di e prome "hala" di St. Antonius College den cunucu di cocolishi poco mas pabou y pasuit di St. Jozef School.

Na september 1960 St. Antonius College ta habri na Sta. Cruz y 1ste y 2de klas di MULO a continua pero cu mucha muhe den un lokaal y mucha homber den otro lokaal.

Den transcurso di aña 1961 nos por a papia di "gemengde groepen", esta mucha homber y mucha muhe hunto. Dia 19 di januari 1962, Monseigneur Holterman a bendiciona e scol nobo. Zr. Cecilia mes a yega Aruba na aña 1957 y a traha na Hospital y despues a bay traha como maestra di scol. Zr. Cecilia a bira asina e prome cabesante di St. Antonius College y a keda cabesante te na juli 1976. Lamentablemente dia 15 di oktober 2003, Zr. Cecilia a bay laga nos. Su balentia y perseverancia semper a keda como ehempel pa nos.

Despues di e periodo aki, esta despues di 1976, Sr. Esteban Solagnier (Chebito) a tuma over y a maneha e barco te na 1992. Durante e periodo aki St. Antonius College a cambia su nomber pa Papiamento y a bira Colegio San Antonio. Despues cu Sr. Solagnier a bay cu un penshun bon mereci, Juffrouw Ria Mossel a dirigi e scol y a keda den e funcion aki te na aña 2001. Desde 2001 Colegio San Antonio tin como Director Sr. Mario Tromp.

Nos mester agrega tambe cu na e scol aki a cuminsa cu e prome "avond onderwijs" (HBS) na Aruba. Algun ex-alumno di MULO a cuminsa cu e iniciativa pa laga "lesmateriaal" bin for di Hulanda (L.O.I.) pa por a sigui cu e tipo di enseñanza aki na Aruba. Zr. Cecilia a pone local disponibel pa e lesnan di anochi. E prome maestronan a duna e lesnan "pro deo". Mas despues e bunita iniciativa aki a bira un fundacion y un di e motornan grandi tras di esaki tabata Zr. Antonia.

Mester bisa cu Colegio San Antonio a produci hopi hoben balente y dinamico cu tin of tabatin puestonan clave den nos comunidad. Entre nan nos por menciona Sr. Edwin Tromp cu tabata presidente nan Aruba Bank, Sr. Atan Lee, Sr. Mike Lampe actual director di Filomena College, Sr. Gaby Werleman, un persona cu tabatin un posicion clave na WEB, nos ex-Prome Minister Sr. Nelson Oduber y hopi mas.

Por bisa cu Señor G.F.(Betico) Croes tambe a traha como maestro na Colegio San Antonio.

Na September 2010, Colegio San Antonio a cuminsa cu su celebracion di 50 aña. Como cu e scol mes, den un forma no-oficial a cuminsa for di 1959, nos a cuminsa cu e celebracion den un forma pasivo for di december 2009, ora cu nos a tene nos prome accion bou di e "slogan": " Despues di 50 aña di a ricibi, awor Colegio San Antonio kier contribui".

E accion aki a produci mas di 130 macuto di cuminda pa esnan menos afortuna, pricipalmente den e bario di Sta. Cruz. E accion aki a keda realisa pa e cuerpo di docente, directiva y alumnonan di Colegio San Antonio. Tambe nos a haya ayudo di Centro Parokial Santa Cruz. Na December 2010 nos a tene un accion di fin di aña bou di e lema: "Het goede doel". E alumnonan mas grandi a bishita y entretene esnan di San Pedro Pavilioen, Casa Cuna, Sonrisa, Man na Obra y hopi mas. Aki a yuda nan den diferente forma. E alumnonan mas chikito a traha basket di Pasco y a entrega esakinan na varios famia. E accion aki tambe tabata un exito

Crecemento y expansion

Den transcurso di e añanan cu a pasa e scol a crece enormemente. Tempo cu a expande e scol pa ubica e departamento de ETAO, nan a construi 7 "noodlokalen" cu mester a keda pa 1 aña pa asina duna chens pa traha un "hala" nobo parti pasuit di e edificio actual unda lo a ubica e departamento nobo. Lamentablemente e edificio nobo nunca a bin y e "Noodlokalen" ta para eynan pa mas di 40 aña. No obstante hopi peticion, ainda nos no a haya ni edificio nobo, ni renobacion di esun existente.

Di e 7 "noodlokalen", 5 ta den uzo ainda (deplorabel) y nos a haya 5 trailer acerca for di 3 diferente compania. Mientrastanto e scol tin mas cu 450 alumno y mester bisa si cu apesar di e infrastructura pober aki e alumnonan ta produciendo satisfactoriamente.

Nos scol ta consisti actualmente di 21 lokaal, di cua 5 di palo, 5 trailer, un gymzaal ("overdekte speelplaats"), un "lerarenkamer" y un cantina.

Como scol nos ta trata na duna e miho enseñansa posibel pa asina e alumno produci riba e nivel cu ta wordo exigi di dje. Colegio San Antonio ta conoci pa ta un scol cu hopi disciplina y nos kier mantene esaki asina tambe.

Nos scol na e momento aki ta den pleno desaroyo pa loke ta trata automatisacion. Ya pa cinco aña caba nos ta trahando riba un sitema di "leerlingvolgsysteem" y pa e aña escolar nobo nos lo tin e sistema completamente cla. Nos muchanan lo uza un identificacion y riba esaki tin un "bar-code". Pa medio di un simpel scan e sistema por registra cualkier accion di e alumno. P.e. ora e yega laat, ora e ta ausente y hopi mas. Tambe e mayornan lo tin acceso na tur cifra y actividad di e alumno. Cu e sistema aki Colegio San Antonio lo ta un di e promenan cu tin un sistema asina sofestica. Tambe ta asina cu nos alumnonan pa medio di nan identificacion ta automaticamente miembro di nos Biblioteca Nacional.

Cu nan "studentenkaart" nan por fia buki na Biblioteca Nacional.

E scol a cuminsa na aña 1959 (aña escolar 59-60) y e lesnan a cuminsa na september 1960 (aña escolar 60-61) den e edificio nobo. Pesey nos a tuma un lapso di tempo mas amplio di celebracion, pa asina cubri tur dos aña. For di december 2009 nos a cuminsa nos celebracion den un forma pasivo y lo sigui te cu juli 2011. Awor nos lo ta mas activo cu e celebracion aki. Na juli aña pasa, esta 2010, tabatin un grupo for di añanan 59 te 64 cu a tene un reuni na nos scol. Tin hende cu a bin for di Hulanda y otro caminda pa asina bin topa otro. Tabatin un exposicion tambe di e dushi tempo ey. For di oktober 2010 nos a intensifica e acontecimientonan y esaki ta mas bien pa trece tur ex-alumno hunto y pa nos yuda recauda fondo pa scol por haya airco pa tur lokaal. E instalacionan pa esaki ya ta cla caba. Nos comision di Mayor ta trahando duro pa asina cambia tur e bentanan di tur e lokaalnan.

Colegio San Antonio, consistiendo di un team dinamico y profesional ta y lo keda traha na bienestar di nos enseñansa pa asina yuda nos hobennan haya e luga cu nan merece den nos comunidad.

Aña pasa e graduadonan di Colegio San Antonio tabatin un resultado exitoso atrobe. Nos ta orguyoso cu 84% di e hobennan a pasa nan examen cu exito. Nos lo sigui traha cu hopi entusiasmo pa sigui guia e hobennan den un enseñanza profesional manera nos pais ta exigi di nos.

Pabien na tur alumno, ex-alumno, docente, ex-docente y henter Pueblo di Aruba y muy en particular e pueblo di Sta. Cruz cu e celebracion di 50 aña aki. Nos ta spera cu Colegio San Antonio cumpli hopi mas.